पालिकालाई शिक्षा सम्बन्धी केहि प्रश्नहरु

                                                                        

नेपालको संविधान २०७२ बमोजिम विद्यालय शिक्षा सम्बन्धि सबै अधिकारहरु स्थानीय सरकारमा रहेकाछन् । स्थानीय सरकारको भखरै पहिलो कार्यकाल समापन भएको र दोश्रो कार्यकाल शुरु भएको छ । यस्तो अवस्थामा स्थानीय सरकारसँग विद्यालय सबलीकरण तथा सुधारका लागि मेरो केहि जिज्ञासाहरु रहेकाछन् । स्थानीय सरकार, तपाईले ……

•  कहिलेसम्म शिक्षाका कार्यक्रम गर्न आन्तरिक क्षमता विकासलाई भन्दा ठेक्का प्रणालीलाई जोड दिनुहुन्छ ?
•  कहिलेसम्म सरकारले तोके बमोजिम निर्धारण गरेको शिक्षाको दरबन्दी पुरा नगरि कामकाज गर्ने गरी प्रशासनको ब्यक्ति वा विद्यालयको शिक्षकलाई शिक्षा शाखाको  जिम्मेबारी दिनुहुन्छ ? 
• कहिलेसम्म विद्यालय शिक्षाको सुधारको लागि स्थानीय तह वा वडाको निश्चित न्युनत्तम प्रतिशत बजेट अनिवार्य रुपमा बजेट विनियोजन गर्ने गरी नीतिगत ब्यवस्था गर्नुहुन्छ ?
• कहिलेसम्म पाठ्यक्रम विकासको सैद्दान्तिक तथा ब्यवहारीक ज्ञान सीप नै नभएका ब्यक्तिलाई पनि स्थानीय पाठ्यक्रम निर्माणमा विशेषज्ञका रुपमा परिचालन हुनुहुन्छ ?
• सरकारले तोकेको पाठ्यक्रम तथा पाठ्यपुस्तक नै लागु नगरिकन एउटा निजी कम्पनीका पाठ्यपुस्तक लागु भइरहेको दृश्य कहिले सम्म नदेखे जस्तै गरिरहनुहुन्छ ? 
•  कहिलेसम्म एउटै र पहुँच भएका विद्यालयलाई मात्र कार्यक्रम दिइरहने हो ?
•  कहिलेसम्म हरेक आवमा शिक्षा क्षेत्रमा यो चहिं निश्चित नतिजा प्राप्त गर्छु भनेर नतिजा वा परिवर्तनको खाका तय गरी  त्यसको लागि कार्यक्रम निर्धारण गर्ने र त्यसको मूल्यांकन गर्ने परिपाटीको विकास नगर्ने हो ?
•  बर्षेको कतिपटक कति विद्यालयमा गएरै विद्यालयलाई दिएको कार्यक्रम अनुगमन गर्नुभयो कि विल मात्र लेखा शाखालाई बुझाउदा हुने हो र यदि विद्यालयलाई यो गरेका छौ भन्ने हो ?
•   कतिपटक र के सहयोग विद्यालयका शिक्षकको पेशागत सहयोगको लागि गर्नु भयो  कि  गाली र भाषण मात्र गरेर सुधार आउने हो ? 
• तालिम त सञ्चालन गर्नुभयो, अन्य निकायहरुबाट पनि भयो । तर त्यो तालिमले विद्यालयमा के परिवर्तन गर्यो, शिक्षणसिकाइमा के परिवर्तन गर्यो विद्यार्थी सिकाइ उपलब्धीमा के सहयोग गर्यो भन्ने कहिले नहेर्नु पर्ने हो की केहि संयन्त्र बनाउनु पर्ने हो ?
• विद्यालयमा हुने परीक्षा केबल विद्यार्थीको पासफेल गराउनको लागि मात्र हो की विभिन्न आधारमा विद्यार्थीको अंकको विश्लेषण गरी त्यसको प्रतिवेदन सहित सरोकारवालाहरुसँग छलफल गरी सुधारको लागि योजना बनाउनु पर्ने हो ?

यी त केहि प्रतिनिधिमुलक जिज्ञासाहरु मात्र हुन् । यस्ता संयौ जिज्ञासाहरुलाई ध्यानमा राख्दै स्थानीय सरकारले पुर्णरुपमा यो दोश्रो कार्यकालमा शिक्षा क्षेत्रको सबलीकरण, नतिजा केन्द्रित क्रियाकलापहरु, विद्यार्थीको सिकाइ केन्द्रित क्रियाकलाप,  प्रधानाध्यापको शैक्षणिक नेतृत्व र शिक्षकको पेशागत सहयोगमा क्षेत्रमा काम गर्दै सबैको पहिलो रोजाइमा सामुदायिक विद्यालयहरु बनाउन क्रियाशिल हुनु पर्ने कुरा दुइ मत नहोला ।